Ang pagpapangalan sa inyong negosyo ay mahalagang bahagi ng paglikha ng inyong brand. Higit pa ito sa pagpapangalan ng inyong negosyo ayon sa inyong sarili o sa apelyido ng inyong pamilya, o sa paborito ninyong bagay sa mundo. Kailangan na ang pangalan ng inyong negosyo ay madaling baybayin, madaling tandaan, madaling maunawaan, katulad ng isang pangalang malinaw na naglalarawan kung tungkol saan ang inyong negosyo. Marami pang ibang salik na dapat isaalang-alang sa pagpapangalan ng inyong negosyo. Nariyan ang pagiging available nito sa mga rekord ng negosyo ng estado o bansa, at dapat din itong tumugon sa ilang mga kinakailangan (kung mayroon man) sa bansa kung saan ninyo itinatatag ang inyong negosyo. Mayroon ding napakahalagang konsiderasyon na hindi dapat makaligtaan: kapag pinangalanan ninyo ang inyong negosyo at mayroon kayong mga layunin o plano sa hinaharap na magpalawak sa ibang bansa, dapat itong umangkop sa kultura at pag-unawa ng ibang mga bansa. Narito ang ilang punto na dapat tandaan sa pagpapasya ng pangalan ng negosyo:
1. Legal na Pangalan para sa mga Dokumento ng Inkorporasyon
Ang legal na pangalan ng negosyo ay tumutukoy sa opisyal na pangalang ginagamit ninyo kapag nagsusumite kayo ng mga dokumento para sa pagpaparehistro ng negosyo at pagbubuwis. Lumalabas ito sa inyong mga legal na dokumento ng negosyo. Ang legal na pangalan ng inyong negosyo ay dapat maiba sa mga pangalan ng ibang negosyong nakatala sa mga listahan ng pangalan ng negosyo ng pamahalaan. Gayunpaman, bagama’t isang legal na pangalan lamang ang pinapayagan ninyong magkaroon sa isang pagkakataon, maaari pa rin kayong magkaroon ng anumang “doing-business-as” na (mga) pangalan nang sabay. Halimbawa, kung ang legal na pangalan ng inyong negosyo ay “ABC Corporation”, maaari pa rin kayong magsumite ng “doing-business-as” na pangalang “Hot Spots” na magagamit ninyo sa inyong mga anunsyo, signage, at iba pang marketing collateral.
2. Dapat madaling bigkasin at madaling baybayin ang mga Pangalan ng Negosyo.
Maaaring mukhang napakababaw nito, ngunit malaki ang naitutulong ng pangalan ng negosyong madaling bigkasin at madaling baybayin. Malaki ang kinalaman nito sa pag-alala ng mga mamimili. Kung ang uri ng inyong negosyo ay auto supply at pinangalanan ninyo itong Oto Sooplys and Repair, at pinag-uusapan ninyo ito ng isang kaibigan sa telepono. Pagkatapos ng inyong tawag, hahanapin kayo ng inyong kaibigan sa Internet at hindi kayo mahahanap dahil iba at mahirap pala ang baybay ng pangalan ng inyong negosyo.
3. Mainam na pangalanan ang inyong negosyo ayon sa uri nito.
Hindi magandang ideya na pangalanan ang inyong negosyo mula sa isang salitang sa tingin ninyo ay astig ngunit walang kinalaman sa inyong negosyo. Mawawalan ang inyong negosyo ng mga potensyal na kliyente dahil lang sa pagsisikap ninyong ipaliwanag kung ano ang iniaalok ng inyong negosyo, ano ang ibig sabihin nito at ano talaga ang magagawa ninyo para sa kanila.
4. Makatwiran ang Pagreserba ng Pangalan sa mga Rekord ng Negosyo ng Pamahalaan.
Kung hindi nakareserba ang gusto ninyong pangalan sa mga rekord ng pamahalaan, mananatili itong available para sa iba. Maaari ninyong ireserba ang gusto ninyong pangalan upang protektahan ang inyong karapatang gamitin ito, kadalasan ay para lamang sa tiyak na panahon, at pagkatapos ay kailangan ninyong i-renew ang proteksyon nito sa maliit na halaga. Habang may bisa ang inyong reserbasyon ng pangalan, hindi magagamit ng ibang negosyo ang pangalang inyong nireserba. Isa itong matalinong desisyon kahit hindi pa operational ang inyong negosyo, o isa pa lamang ligaw na imahinasyon, dahil nakatutulong itong pigilan ang ibang kumpanya na mabuo, maging kwalipikado, magreserba, magparehistro, o magpalit ng pangalan gamit ang inyong nakareserbang pangalan.
